Foursqare loksins að þjónust rekstraraðila (örblogg)

Sem mikill velunandi Foursqare, hef ég litið það hornauga hvað það tekur langan tíma fyrir jafn framsækið fyrirtæki að senda staðfestingu fyrir rekstraraðila sem vilja nýta þjónustuna sér í hag.  Hvað þá að staðfesting komi með skríðandi hægar en afgreiðsla hjá skattstjóra og það með "snailmail.  Nú hinsvegar hafa fjórhyrningarnir loksins ákveðið að bæta úr þessum kjánalega ókosti.  Með því að spreða litlum 10$ gefst rekstraraðilum nú tækifæri á að ganga frá ferlinu samdægurs í stað þess að bíða þrjár til fjórar vikur.

Sjá nánar á bloggi Foursquare

"Öl er annar maður" - eins og skáldið sagði

Sitt sýnist hverjum með að markaðssetja öl ofan í hátíð ljóss & friðar.  Hinsvegar, verð ég að segja að þetta er hreint út sagt kostuleg nálgun.

Heineken hafa sett upp leik (app) á facebook síðu sinni sem raunverulega þjónar þínum hagsmunum, ef þú ert bjórsvelgur.   Hverjum langar ekki í bjórdælu í íbúðina hjá sér.  Ef ekki núna, þá pottþétt þegar þú varst einhleyp/ur.

Nú stærsta vandamálið fyrir jólavertíð Heineken hefur augljóslega verið að selja þessar fínu bjórdælur sem veglega jólagjöf.  Ekki beint það sem þér dettur fyrst í hug, þegar leitast er eftir pakka handa vinum eða vandamönnum.  Hinsvegar kann að vera að þú sjálf/ur myndir
hoppa hæð þína af kæti ef slíkan pakka mætti finna (á sér) á aðfangardag.

Með Facebook appi Heineken getur þú núna splæst í svona dælu á "vin" sem sárlega vantar bjórdælu til að halda "gleðileg" (já, setti gæsalappir við hversu raunveruleg sú gleði yrði) jól.  Appið síðan tryggir að við að gefa svona dælu, verði þér einnig færð slík dæla að gjöf.  Það einfaldlega birtist huggulegur bögull heima hjá þér frá "Lúlla Jóns", sem er núna uppáhalds vinur þinn á fésinu. 

Frábær notkun á facebook App.  Sjá síðu Heineken

Það sem þeir rita, skiptir öllu máli

Ég tel það víst, að hvort sem þú ert bílstjóri, forstjóri, námumaður eða námsmaður þá ertu vafalaust búnn að átta þig á krafti samfélagsmiðla.

Netið hreinlega logar, þar sem menn virðast ræða óspart (og án nærgætni) ákveðið málefni sem virðist vera milli tannanna hjá öllum.  Keppast um að senda hvor öðrum hvimleiða "like" leiki og/eða skiptast á sögum úr daglegu lífi.  Hvað var gert, hvert var farið, hvað var keypt og hvernig var.

Hefðbundinn neytandi talar um eða nefnir fyrirtæki (vöru þess eða þjónustu) yfir 90 sinnum í hverri viku, þar sem hann hefur með því áhrif á ímynd þess og orðspor (Keller Fay, WOMMA, 2010)  og kauphegðun vina og kunningja.  Í rannsókn sem gerð var af síðunni My Yearbook, sögðust 81% aðspurðra hafa þegið ráð frá fésbókar félögum áður en ákveðin vara eða þjónusta var keypt.  74% þeirra sögðust taka mark á því sem vinir þeirra höfðu að segja um vöruna.

Einnig kom í ljós að 9 af hverjum 10 segist treysta því sem vinir þeirra deila á facebook sé satt. Það sem er enn merkilegra er að um 70% aðspurðra viðurkenna að taka mark á því sem ókunnugir hafa að segja um viðkomandi vöru, vörumerki eða þjónustu á þessum miðlum.

Hvað segir þetta okkur.  Jú mögulega ættu íslensk fyrirtæki betur að huga að fylgjendum á facebook frekar en að snara öllu í (misgóða) leiki.   Hvernig væri að reyna að fá fólk til að deila jákvæðum punktum um vöru eða þjónustu? Í stað þess að "spama" allt og alla með stöðluðum textum um ágæti vöru eða fyrirtækis, þegar þú tekur þátt í leikjum á þeirra vegum (auto post) - sem fer ofan í kokk okkar flestra alveg þveröfugt. 

Hvernig væri að virkja fylgjendur á facebook til að koma með nytsamlega punkta um það sem betur má fara? eða leitast eftir rós í hnappagatið fyrir það sem vel gengur.  Því það er heldur ekkert launungarmál að það eru ófá fyrirtæki hérlendis sem eru að sinna þessum málum mjög vel.  Huga að núverandi viðskiptavinum & hlusta á þá.... ekki bara í síma, heldur hvað þeir segja á netinu.  Afhverju, nú það hreinlega sparar skilding og mögulega skilar sér í aukinni sölu.

Auðvelt er að lofa, örðugt að efna .... eitthvað sem mörg fyrirtæki / auglýsingastofur ættu að taka til sín.

Er google+ dautt drasl?

Eins og flestir vita, hefur risinn Google hleypt af stokkunum samskiptasíðunni Google+.  Síðunni er ætlað að fara í beina samkeppni við samfélagsmiðilinn facebook.

Nú nýlega opnaði google+ á síður fyrir vörumerki & fyrirtæki.  Síðurnar eru við fyrstu sýn keimlíkar fanpage síðum facebook, en svo er þó ekki.  Það sem er merkilegast í þeim samanburði er að hvorki notendur né fyrirtækin virðast vera að nota þessar síður af einhverju viti.  Einfaldlega byrjuðu "allir" en síðan ekki söguna meir.

Helstu vörumerki heims voru fljót að stökkva um borð, þegar Google opnaði fyrir þennan möguleika.  Hér fyrir neðan má finna lista af erlendum og íslenskum vörumerkjum / fyrirtækjum á google+. Allar síðurnar líta virkilega vel út og er greinilegt að vinna hefur verið lögð í að setja þær smekklega upp. Í dæmunum hér fyrir neðan, má sjá að tvíhliða-samskipti eru nær engin og fylgjendur eru nær dauða en lífi.  Þátttaka og virði þeirra er því ei mikið.

Pepsi (20130 - fylgjendur)
Einn stærsti drykkjarframleiðandi heims, var ekki lengi að setja upp + síðu fyrir sitt vörumerki.  Pepsi sem hefur verið leiðandi í notkun samfélagsmiðla, var í fyrstu hrósað fyrir flotta nálgun og notkun á google+.  Náði upp stórum hópi fylgjenda og voru teknir sem dæmi um hvernig ætti að nýta þennan nýja miðil. Nú hinsvegar hefur google+ síða Pepsi ekki verið uppfærð í nær þrjár vikur.

 

Coca Cola (837 - fylgjendur)

Hér er sömu sögu að segja. Coke menn voru fljótir að skella upp flottri síðu, en að sama skapi hafa þeir ekki uppfært síðuna í nær tvær vikur.  Ef horft er á síðasta status má sjá að það eru aðeins 5 virkir notendur, sem taka þátt í samskiptum við vörumerkið.   

McDonalds (540 - fylgjendur)

Kannski eru þeir enn að móta sína stefnu og nálgun á google+, eða einfaldlega hættu þeir bara við áður en þeir byrjuðu.  Því þessi risastóra keðja hefur ekki einu sinni sett inn einn status, mynd eða átt í samskiptum við fylgjendur sína á neinn hátt.  Enda er hópurinn sem fylgir makkanum lítill sem enginn.

 

Síminn:(4 - fylgjendur)

Síminn ásamt kollegum sínum úr fjarskiptageiranum hafa verið mjög virkir í notkun helstu samfélagsmiðla. Síminn hefur sett upp sína + síðu, sett inn hressandi status (plús í kladdann fyrir húmorinn) en ekkert hefur síðan gerst í þrjár vikur.

Vodafone
Það sama má segja um Vodafone og Símann.  Sett hefur verið upp mjög smekkleg + síða, þar sem fylgjendur hafa átt í nær engum samskiptum við vörumerkið

Pipar (5 -fylgjendur)
Auglýsingastofan sem gefur sig út fyrir að vera algjörlega "spot on" í samfélagsmiðlum, hefur heldur ekki virkjað sína + síðu. Allavega er hér ekkert að finna ... einfaldlega ekkert.

 

Ekkert er fullreynt í fyrsta sinn.  Google hefur nú brennt sig á því að reyna að skapa samfélagsmiðil áður.  Er google+ ekki með það sem þarf,  eða eru notendur einfaldlega bara búnir að fá nóg af "corporate" fnyknum sem gnæfir yfir alla samfélagsmiðla?

PR klúður hjá Nýherja?

Smá pæling
Nú verð ég að játa að við lestur á þessari frétt, fetti ég upp á nefið og fussaði.  Ef ég væri yfirmaður í Nýherja veit ég ekki hvort ég væri bitrari út í blaðamann mbl sem (á skemmtilegan máta) hreytir í fyrirtækið í loka setningunni, þar sem hann tekur fram að Nýherji jafnt styðji við landslið kvenna í handbolta sem og reki þær sem hann stunda um of.  Nú eða upplýsingarfulltrúann fyrir að "missa stjórn" á umfjölluninni á þennan máta.

Gildin
Að styðja kvennalandsliðið í handbolta, en láta síðan spyrjast út að starfsmaður hafi þurft að velja milli starfs og leiks. Það vekur upp spurningarmerki um gildi fyrirtækisins. Gildum er ætlað að ýta undir góð vinnubrögð með því að hafa jákvæð áhrif á starfsmenn og tilgreina þá hegðun sem er ásættanleg.  Með þessu móti fær starfsfólk frelsi til athafna, en er þó bundið þeim grunngildum sem höfð skulu að leiðarljósi.  Skeggjaðir menn (fræðimenn) eru á því að sameiginleg gildi efla bæði viðleitni starfsmanna og frammistöðu fyrirtækisins í heild. 

Orðspor og ímynd Nýherja
Nýherji er eitt af 20 bestu fyrirækjum Íslands til að starfa fyrir, samkvæmt mælingum VR. Fyrirtækið er einn helsti hástökkvarinn í leitinni að fyrirtæki ársins 2011.  En  milli ára hoppar Nýherji úr 93.sæti í það 17.  Ber þar helst að nefna frábærar tölur í mælingu á ímynd fyrirtækisins, sem er töluvert yfir meðaltali.

Hvaða áhrif hefur svona frétt?
Það er einfalt.  hún hefur bein áhrif á viðhorf okkar til fyrirtækisins. Viðhorf birtast okkur í daglegu lífi meðal annars í formi fordóma og staðalmynda.  Viðhorf eru sálfræðileg tilhneiging sem tjáð er með því að meta tiltekin hlut jákvætt eða neikvætt. Tilfinningar og mat á einherju, sem skilar ákveðinni mælanlegri svörun má þannig skilgreina sem viðhorf.  Þessi ágætu viðhorf okkar sem eru allt í senn jákvæð eða neikvæð, á rökum reist eða hreinlega byggð á sögusögnum. Þannig er augljóst að frétt sem þessi getur haft afgerandi áhrif á viðhorf almennings .  Viðhorf hefur síðan bein áhrif á mat viðkomandi á Nýherja og þannig á þá ímynd (orðspor) sem fyrirtækið hefur í huga hvers og eins (Misjafnt hvernig hver og einn uplifir fyrirtækið, þessa frétt nú eða aðra viðburði)

Og hvað með það?
Flestir telja sig vita upp á hár hvað átt er við þegar talað er um ímynd, en þó er vert að benda á að merking hugtaksins er einfaldlega ekki alltaf svo skýr.  Í daglegu tali vísar ímynd oftast til þeirra viðhorfa og trúar sem viðkomandi hefur á einstakling, fyrirtæki, vöru eða vörumerki.  Án þess að detta of mikið í fræðimensku er þó vert að benda á að ímynd má skipta í vöruímynd og fyrirtækjaímynd.  Með vöruímynd er átt við þá skoðun eða reynslu sem þú (neytandinn) hefur af viðkomandi vöru / vörumerki. Vörur eru framleiddar og auðveldara er að stjórna og byggja hana upp. Vöruímynd hefur síðan mikil áhrif á ímynd fyrirtækisins í heild.   En ímyndin sem við erum að tala um hér, er mun stærri & mun verðmætari.  Hér erum við að lesa um frétt sem mögulega hefur "bein áhrif" á heildarsýn okkar á fyrirtækinu.  En lykilþættir í fyrirtækjaímynd eru einmitt nafn, staðsetning, höfuðstöðvar og síðast en ekki síst - samskipti við starfsfólk.

Við viljum ekki versla við fyrirtæki sem eru með neikvæða ímynd.  Við viljum ekki starfa fyrir fyrirtækja sem hafa slaka ímynd & við gefum slíkum fyrirtækjum minna svigrúm komi eitthvað upp á.  Skjót og fagleg vinnubrögð geta haft áhrif á "laskaða ímynd" fyrirtækja, en ég er hér ekki að leggja dóm á það hvort þetta mál sé svo drastískt eður ei.  Hinsvegar vildi ég einfaldlega benda á mikilvægi þess að samræmi sé á öllu efni sem snýr að fyrirtækinu. Hvort heldur sem um er að ræða á heimasíðu, fésbókinni  markaðsefni (við styrkjum kvennalandsliðið í hanbolta) nú eða í frétt sem þessari. Auk þess skiptir sköpum hvað talsmenn / yfirmenn Nýherja gera nú.

Spurning hvort aurinn sem fór til styrktar kvennalandsliðinu í handbolta sé hér farinn í vaskinn? 

Samsung - ekki láta Apple hafa þig að fífli

Undanfarin ár hafa iPhone notendur haft svör á reiðum höndum, afhverju þeir myndi ALDREI skipta yfir í Android.

• upphaflega, voru Android tækin álíka spennandi og súrkál við hlið iPhone
• Þegar handtækin urðu betur samkeppnishæf, var hægt að benda á að iOS stýrikerfið væri mun stærra & hentugara til vöruþróunar.
• Þegar Android varð stærsta stýrikerfið, var hægt að benda á að það væri jú sameiginleg tala margra framleiðanda. Apple vær því  ennþá stærsti framleiðandinn & töffarinn á markaðnum.

En nú er staðan sú að Android er ekki bara stærsta stýrikerfið,  Á þriðja ársfjórðungi þessa árs hefur framleiðandinn Samsung snýtt Apple og situr nú á toppnum (like a BOSS) sem stærsti snjallsímaframleiðandi heims.

Samsung orðnir hressilega hrokafullir?

Já & ég er að fíla það. Að bíða í röð eftir nýrri Apple vöru, hefur orðið að einhverskonar "trendi" út í hinum stóra heimi.  Þar virðast lattelepjandilopapeysupakk safnast saman í hópum til að vera með þeim fyrstu til að fingra nýjan iPhone eða fikra sig áfram á nýjum iPad.  Hér erum við ekki að tala um eðlilega röð, heldur eitthvað sem er korter í klikkun.   Fólk safnast jafnvel saman mörgum dögum áður en opnað er.  

Samsung, nýkrýndur konungur á markaðnum er ekki með þetta "hippster touch" sem Eplið hefur.  Þeir eru þó heldur betur að svara fyrir sig og ég verð að segja að fyrir mitt leyti, náði þessi auglýsing til mín.  Hún allavega er hress og það er bókað að hún fer mjög væral og það mjög hratt.

Hvað um það …. ég ætla að skipta úr Samsung Galaxy símanum yfir í nýjan Iphone 4s, því nú get ég með réttu sagt að ég sé ekki hjarðdýr.  Ég vill ekki vera eins og pöpullinn með Samsung síma :Þ

Hversu "smart" eru neytendur?

Sem markaðsmaður & sem neytandi vakti þessi vara mig til umhugsunar

Með nýjan iphone 4s á leiðinni frá Kanada ... slefandi yfir þessum "nauðsynlegu" úrum, fór ég að hugsa. Í þessum ólgusjó sem oftast er kenndur við "snjallsímavæðinguna" - hvar byrjar og endar hin raunverulega þörf mín fyrir tækjum, tækni og tólum ?

Ég persónulega get t.d.ekki lifað án þess að hafa símann við hönd.  Ég einfaldlega verð að geta sótt minn tölvupóst, skoðað hvað er að gerast á facebook & sótt mér upplýsingar og verið í samskiptum við þá/það sem er að gerast í mínu nánasta umhverfi.  Sú þörf er þó mín, en ekki allra. Margir af mínum nánustu vinum skilja einfaldlega ekki hvernig ég tími að sólunda tíma mínum á slíkan máta.

En afhverju í ósköpunum....

• Langar mig að geta skoðað tölvupóstinn minn í úrinu?
• Myndi mér langa að geta svarað í símann með úrinu, þegar ég er með símann í vasanum?
• Vill ég borga fúlgu fjár til þess að geta farið á netið í úrinu?

Hef ég þörf fyrir þessa vöru?

Samkvæmt félagsfræði 101 (almenn skynsemi) eru lífsnauðsynlegar þarfir skilgreindar sem: súrefni, nærings, ást, umhyggja og samskipti við aðra o.s.frv.  Félagsmótun, okkar eigin gildi og viðmið hafa síðan áhrif á hvernig við höfum þá helst samskipti við þá sem okkur skipta hvað mestu máli.  Bæði efnislegar og félagslegar þarfir okkar eru út frá því mismunandi eftir því t.d. hvert umhverfi okkar er, hvernig uppeldi okkar var, og hver áhersla á veraldlega "blingaða" hluti var í æsku.  Síðast en ekki síst, hvaða áhrif hefur viðkomandi vara á okkar eigin sjálfsmynd?  Hvar liggur línan milli raunverulegrar þarfar, markaðssetningar og jafnvel félagsmótunar.

Samkvæmt skilgreiningu eru gerfiþarfir, allt það sem við getum einfaldlega lifað án.  Þó eru fræðimenn ekki á eitt sáttir með þessa skilgreiningu og vilja meina að hugtakið "gerfiþörf" sé í raun afstætt, þar sem allar þarfir séu raunverulegar þótt þær séu ekki beint það sem Maslow vinur okkar hafði í huga.

Með tilkomu snjallsímans mun markaðurinn fyrir aðrar "nytjavörur" sem I'm Watch stækka hratt og örugglega.  Síðasta fíflið er ekki fætt, muldra eflaust margir.  En hvað um það.  Spurningin er þó hvar mörkin eru á milli þess að framleiða & markaðssetja vöru sem raunverulega bætir lífið, þess sem þarf að kenna fólki á (t.d. netið í símann - sem enginn er háður nema að hafa vanið sig á) og þess sem hefur engu "raunverulegu" við lífð að bæta, en bara svín lúkkar

Dæmi hver fyrir sig - ég veit allavega að mig sárvantar eitt svona :Þ